Миний цаг

              Бяцхан охин мэдээ орсон цагаасаа эхлэн эхийн халамж хайранд умбаж өссөн бөгөөд ээж нь түүнийг Цасангоог гүнжээс ч илүү хөөрхөн гэж хэлдэгт итгэж байжээ. Охин цав цагаан царайтай, мойл хар нүдтэй гэнэ. 
             Харин сургуульд ороход бүх зүйл өөрөөр эргэжээ. Хүүхдүүд түүнийг хөөрхөн байтугай харин ч хамгийн царай муутай гэж хэлдэг болов. 
             Охин эхлээд тэр ярианд итгэсэнгүй. Учир нь бүгд л бие биендээ атаархадаг шүү дээ. Гэвч он эил өнгөрөхөд бодит байдалтай тулгарчээ. Нялх хүүхдийнх шиг гэдэг байсан нүүрний арьс нь хөгшин хүнийх шиг үрчлээгээр дүүрэн, мойл хар нүд нь хялар байлаа. Нуруу нь хус шиг шулуун биш ажээ. Ээж нь түүнийг энэ олон жил хуурсан байв. 
           Залуу охин ээжийгээ хайрлах хайр нь үзэн ядалт болж солигдлоо. Гэрлэх нас болсон ч түүнийг тоох хүн байсангүй. Дээр нь хичнээн их эмчлэвч нүд нь засрахгүй байлаа. 
           Эмч нарын яриаг нууцаар сонсоод аажмаар сохроно гэдгээ мэдсэн охин одоог хүртэл багынх нь хэвээр өхөөрддөг ээжийнхээ худал яриаг тэвчилгүй гэрээсээ явахаар шийдэв. Гэвч ээж нь өөр хотод жилд орохоор болсноо хэлээд түрүүлээд гэрээсээ явжээ. Олсон мөнгөө найздаа үлдээгээд охиноо сайн харж байхыг хүссэн байна. Бүсгүй хэсэг хугацааны дараа хараагүй болж харанхуйн дунд амьдрах болов. Худалч ээж нь түүнийг үхсэн ч харамсахгүй мэт алга бйлаа. 
            Нэгэн өдөр эмч нар өөрт нь тохирсон нүд олсноо хэлээд мэс засал хийв. Бүсгүй дахин хардаг болоод өнөөх л муухай царайгаа харна гэж бодохоос айж байсан ч алтан нарыг ахин харахыг илүү их хүсчээ. Мөн бусдад дарамт бололгүй амьдрах хэрэгтэй байлаа. 
            Хагалгааны дараа өөрийгөө толинд хараад гайхан дуу алдав. Түүний өмнө энэ дэлхийн хамгийн гоо бүсгүй зогсож байлаа. Нүүрэн дээрх батга оргүй алга болж, яс өндөртэй хамар нь засарч, зэрлэг өвстэй төстэй ширүүн үс нь долгиорон хамирч байв. 
              Бүсгүй дэргэдээ байсан настай эмчийг тэврэн авч:
- Би энэ дэлхийд дахин төрсөн мэт байна. Миний нүүрний өө сэт үлдсэнгүй. Та нар гоо сайхны хагалгаа хийсэн юм уу? хэмээн хашгирлаа. Эмч хариуд нь: 
- Үгүй охин минь. Зөвхөн ээжийн чинь нүдийг шилжүүлэн суулгасан юм хэмээн инээмсэглэн хариулжээ.